Árborg tók á móti toppliði Álftaness í 4. deild karla í knattspyrnu á Selfossvelli í kvöld. Gestirnir fóru með sigur af hólmi, 2-4, og hafa nánast tryggt sér sigur í deildinni.
Álftanes komst yfir á 12. mínútu en Freyr Héðinsson jafnaði metin fjórum mínútum síðar. Bæði lið áttu ágætar sóknir í kjölfarið en gestirnir voru fyrri til að skora á ný, þeir bættu við öðru marki á 43. mínútu og staðan var 1-2 í hálfleik.
Árborg sótti meira á upphafsmínútum seinni hálfleiks en fékk mark í andlitið úr skyndisókn á 54. mínútu og þá var róðurinn orðinn þungur. Smá spenna hljóp í leikinn á 78. mínútu þegar Freyr minnkaði muninn í 2-3 með skallamarki og skriðþunginn var með Árborg í kjölfarið. Gestirnir gerðu hins vegar út um leikinn með fjórða marki sínu á 87. mínútu og þar við sat.
Árborg er og verður í 3. sæti deildarinnar með 33 stig en Álftanes er á toppnum með 48 stig.