Stokkseyri vann mikilvægan sigur þegar BF108 kom í heimsókn á Stokkseyrarvöll í 5. deild karla í knattspyrnu í kvöld. Lokatölur urðu 3-2.
Stokkseyringar komust yfir á 20. mínútu með sjálfsmarki BF108 en gestunum tókst svo að skora í rétt mark í uppbótartíma fyrri hálfleiks og staðan var 1-1 í leikhléi.
Seinni hálfleikurinn var í járnum en um hann miðjan fengu Stokkseyringar vítaspyrnu sem Arilíus Óskarsson skoraði úr. Tíu mínútum síðar jafnaði BF108 og staðan orðin 2-2 en Arilíus átti lokaorðið, hann tryggði Stokkseyringum 3-2 sigur með marki sex mínútum fyrir leikslok.
Stokkseyringar eru í 2. sæti B-riðils með 21 stig en BF108 er í 5. sæti með 16 stig.