Selfyssingar lyftu sér aftur upp í 2. sætið í 2. deild karla í knattspyrnu með góðum sigri á Þrótti Vogum á Selfossvelli í kvöld.
Selfoss komst yfir strax á 6. mínútu þegar fyrirgjöf Elíasar Cooper fór af varnarmanni í netið. Það reyndist eina mark fyrri hálfleiks en Selfoss fékk ótal hornspyrnur í fyrri hálfleiknum og þurftu Þróttarar einu sinni að bjarga á línu.
Staðan var 1-0 í hálfleik en strax á 2. mínútu seinni hálfleiks fengu Selfyssingar dæmda vítaspyrnu og úr henni skoraði Viðar Örn Kjartansson örugglega. Færin voru ekki mörg eftir þetta, Jón Daði Böðvarsson komst nálægt því að skora en skaut í stöng, en annars voru Þróttarar með boltann.
Smá spenna hljóp í leikinn í lokin en Þrótti tókst að minnka muninn í 2-1 á 90. mínútu. Sú spenna varði ekki lengi því strax í næstu sókn fengu Selfyssingar aðra vítaspyrnu og úr henni skoraði Jón Daði og tryggði hann Selfyssingum 3-1 sigur.
Selfoss er í 2. sæti deildarinnar með 15 stig en Þróttur er í 11. sæti með 7 stig.