Ægir tók á móti Fylki í 1. deild karla í knattspyrnu í Þorlákshöfn í kvöld. Ægir er í fallbaráttu en Fylkir sigraði 2-4 og tyllti sér í toppsæti deildarinnar.
Fylkir byrjaði betur í leiknum og þeir skoruðu tvö mörk með tveggja mínútna millibili á fyrsta korterinu. Ægismenn svöruðu þessu áfalli ágætlega og áttu góðar sóknir í kjölfarið en inn vildi boltinn ekki.
Fylkismenn refsuðu þeim svo grimmilega með tveimur mörkum með þriggja mínútna millibili undir lok fyrri hálfleiks og staðan skyndilega orðin 0-4.
Það voru hins vegar Ægismenn sem áttu síðasta orðið í fyrri hálfleik og Jordan Adeyemo minnkaði muninn á lokamínútunni þegar hann slapp innfyrir eftir skógarhlaup markvarðar Fylkis. 1-4 í hálfleik.
Það kviknaði von hjá Ægismönnum í upphafi seinni hálfleiks því strax á 49. mínútu var Adeyemo búinn að skora aftur og minnka muninn í 2-4.
Fleiri urðu mörkin ekki, seinni hálfleikurinn var heldur bragðdaufur en Ægismenn voru nær því að skora og Fylkir bjargaði meðal annars á línu á 69. mínútu.
Ægir er áfram í 11. sætinu með 8 stig en Fylkir fór sem fyrr segir á toppinn, tímabundið í það minnsta.