Tvö HSK met voru bætt í Brúarhlaupinu á Selfossi síðastliðinn laugardag. Hlaupið fór fram við ágætar aðstæður og var hluti af dagskrá Sumars á Selfossi.
Rangæingurinn Hólmfríður Magnúsdóttir, fyrrverandi landsliðskona í knattspyrnu, bætti metið í 5 km götuhlaupi í flokki 40- 44 ára kvenna. Hólmfríður hljóp á 23:55 mín og var fyrst í sínum aldursflokki. Í ljós kom við metaskráningu að loknu hlaupi að hún átti sjálf HSK metið, en hún hljóp vegalengdina í ágúst í fyrra á 23:58. Þá hafði hún bætt HSK met Guðrúnar Erlu Gísladóttir frá Selfossi, sett á Akureyri árið 2013 sem var 24:05 mín.
Gerður Árnadóttir bætti svo HSK metið í 5 km götuhlaupi í flokki 60-64 ára, en hún hljóp á 28:43 mín. Elísabet Valtýsdóttir átti gamla metið, sem var 31:06 mín, sett árið 2012.