Það var gríðalega efnilegur iðkendahópur frá HSK/Selfoss sem mætti á Meistaramót Íslands 11-14 ára í frjálsum íþróttum í Laugardalshöllinni um síðustu helgi. Árangur sunnlensku krakkanna var eftirtektarverður en lið HSK/Selfoss gerði sér lítið fyrir og fékk 511 stig í heildarstigakeppninni og náði örugglega öðru sæti.
Stúlkurnar í 11 og 12 ára flokki voru ötular í stigasöfnuninni og nældu sér í Íslandsmeistaratitla með því að sigra í heildarstigakeppninni í sínum aldursflokkum.
HSK/Selfoss eignaðist fjóra Íslandsmeistara í einstaklingsgreinum. Andri Eldon Hreinsson, Umf. Laugdæla átti frábært mót, hann sigraði í 60 m spretthlaupi, kúluvarpi og fimmtarþraut í flokki 11 ára pilta. Ingibjörg Lára Rúnarsdóttir, Umf. Selfoss, varð Íslandsmeistari í 400 m hlaupi 11 ára stúlkna, Karólína Orradóttir, Íþf. Dímon, stökk hæst allra 12 ára stúlkna í hástökki og sigraði örugglega í fimmtarþraut og Nikulás Tumi Ragnarsson, Umf. Þjótanda, kastaði lengst allra pilta í kúluvarpi 12 ára.
Einn af skemmtilegustu viðburðunum á mótinu eru boðhlaup þar sem stemmingin getur verið rafmögnuð og þar voru sett tvö ný HSK met. Ellefu ára sveit HSK/Selfoss setti HSK met í 4×200 m blönduðu boðhlaupi í 11 ára flokki er hún hljóp á tímanum 2:14,87 mín og sigraði. Sveitina skipuðu Andri Eldon, Helga Þórbjörg Birgisdóttir, Héðinn Fannar Höskuldsson og Ingibjörg Lára.
Blönduð 12 ára sveit setti einnig HSK met en hún hljóp á 2:13,24 mín og varð í 3. sæti í 12 ára flokki. Í sveitinni voru Karólína Orradóttir, Þorbjörg Helga Björgvinsdóttir, Þorkell Ólafur Þórbergsson og Álfheiður Silla Heiðarsdóttir.