Ungt lið HSK náði góðum árangri á bikarkeppni Frjálsíþróttasambands Íslands, sem fram fór í Kaplakrika í Hafnarfirði um síðustu helgi.
HSK varð í 3. sæti keppninnar með 102 stig á eftir ÍR með 130 stig og bikarmeisturum FH með 155 stig.
Þórhildur Sara Jónasdóttir, Umf. Selfoss, setti nýtt héraðsmet í 400 m hlaupi innanhúss í flokki 18-19 ára, hún hljóp á 61,13 sek og bætti þrettán ára gamalt met Sólveigar Helgu Guðjónsdóttur, Umf. Selfoss, um 0,26 sekúndur.
Annað héraðsmet í sama aldursflokki féll á mótinu en kvennasveit HSK í 200 m boðhlaupi hljóp á 1:49,82 mín og bætti fyrra met um slétta sekúndu. Í sveit HSK voru þær Þórhildur Sara, Magnea Furhjelm Magnúsdóttir, Helga Fjóla Erlendsdóttir og Anna Metta Óskarsdóttir.