Selfyssingar unnu tvö gullverðlaun, þrjú silfurverðlaun og tvö bronsverðlaun á Íslandsmótinu í taekwondo í bardaga sem haldið var í íþróttahúsi Digranesskóla í Kópavogi í dag.
Taekwondodeild Umf. Selfoss sendi sjö keppendur til leiks og komust þeir allir á verðlaunapall. Selfoss endaði í fjórða sæti í heildarstigakeppninni.
Dagný María Pétursdóttir sigraði í þungavigt senior kvenna og var hún valin keppandi mótssins í kvennaflokki.
Í junior flokki kvenna vann Viktoría Björg Kristófersdóttir gullverðlaun og Þórunn Sturludóttir Schacht silfur og í cadet flokki kvenna vann Julia Sakowich til silfurverðlauna.
Arnar Breki Jónsson vann silfurverðlaun í cadet flokki karla og í senior flokki karla unnu þeir Björn Jóel Björgvinsson og Sigurjón Bergur Eiríksson báðir bronsverðlaun.
