Ægir vann mikilvægan sigur á Völsungi á Húsavík í 1. deild karla í knattspyrnu í dag. Lokatölur urðu 2-3.
Ægismenn byrjuðu frábærlega í leiknum og Harley Willard kom þeim yfir á 14. mínútu. Tveimur mínútum síðar slapp Markús Máni Jónsson innfyrir vörn Völsungs og kom Ægi í 0-2. Bæði lið fengu fín færi í kjölfarið en Ægismenn leiddu verðskuldað 0-2 í hálfleik.
Ægir slakaði heldur á klónni í seinni hálfleiknum og Völsungur þjarmaði hressilega að þeim. Þegar tíu mínútur voru eftir skoraði Jordan Adeyemo úr einni af fáum sóknum Ægis í seinni hálfleiknum og allt útlit fyrir öruggan sigur þeirra gulu. Spenna hljóp hins vegar í leikinn á lokamínútunum því Völsungi tókst að skora tvisvar en Ægir hélt út og sigraði 2-3.
Með sigrinum lyfti Ægir sér upp í 9. sætið með 7 stig en Völsungur er á botninum án stiga.