Hamarsmenn blómstruðu þegar þeir fengu Vængi Júpíters í heimsókn á Grýluvöll í 4. deild karla í knattspyrnu. Lokatölur urðu 8-0 og Hvergerðingar nálgast 3. deildina óðfluga.
Óliver Þorkelsson kom Hamri yfir strax á 6. mínútu og Brynjólfur Þorsteinsson bætti við öðru marki tíu mínútum síðar. Guido Rancez skoraði svo þriðja markið á 33. mínútu og staðan var 3-0 í hálfleik.
Í seinni hálfleik héldu Hvergerðingum engin bönd. Óliver og Brynjólfur skoruðu snemma með tveggja mínútna millibili og Genaro Peresutti breytti stöðunni í 6-0 á 66. mínútu. Það var svo nægur tími fyrir Brynjólf og Óliver að innsigla þrennurnar og það gerðu þeir báðir á síðustu tuttugu mínútunum.
Hamar er í 2. sæti deildarinnar með 37 stig, tveimur stigum á eftir Álftanesi en þessi tvö lið eru stungin af og stefna hraðbyri upp í 3. deildina.