Árleg jólasýning fimleikadeildar Ungmennafélags Selfoss verður haldin næstkomandi laugardag, þann 10. desember.
Þetta er í ellefta sinn sem sýningin er þemabundin og undanfarna daga hafa iðkendur og þjálfarar lagt nótt við dag til að bjóða gestum í undraheim tröllanna. Eins og alltaf er sýningin hin glæsilegasta og allir iðkendur deildarinnar fá að taka þátt.
Í ár taka tveir gestir þátt í sýningunni, þau Þórdís Imsland og Þórir Geir Guðmundsson ætla að syngja á sýningunni. Að venju verða þrjár sýningar, kl. 9:30, 11:15 og 13:15 og er sýnt í Vallaskóla á Selfossi.
Sú nýbreytni er að þessu sinni að gestir ganga inn á sýninguna íþróttahússmegin en út í gegnum aðalanddyrið þar sem þeim gefst kostur á að gæða sig á kaffi og kruðeríi að sýningu lokinni í tröllaheimi.
Forsala aðgöngumiða verður í Vallaskóla á föstudag kl. 16-18.