Trausti Rafn Björnsson hefur verið ráðinn þjálfari meistaraflokks kvenna hjá knattspyrnudeild Selfoss til næstu tveggja ára.
Trausti, sem er með UEFA A þjálfaragráðu, þekkir vel til hjá félaginu og hefur áður komið að þjálfun kvennaliðsins. Hann var aðstoðarmaður Gunnars Borgþórssonar sumarið 2025 þegar liðið flaug upp úr 2. deild. Frá árinu 2017 hefur Trausti þjálfað yngri flokka á Selfossi með góðum árangri.
„Þetta er spennandi tækifæri og mikill heiður að vera orðinn þjálfari liðsins. Mér þykir vænt um félagið og hlakka til að vinna með leikmönnum og öllu fólkinu í kringum liðið að því að byggja áfram upp öflugt kvennastarf á Selfossi,” segir Trausti í tilkynningu frá Selfyssingum.
„Við höfum margt til að byggja á og ég er spenntur að hefjast handa og takast á við verkefnin framundan.“