Torfæran á Hellu í beinni á netinu

Það er yfirleitt líf og fjör á Hellukeppninni en að þessu sinni verða áhorfendabrekkurnar tóma. Ljósmynd/Aðsend

Sindratorfæran fer fram á Hellu næstkomandi laugardag og að þessu sinni verður hún í beinni útsendingu á netinu.

Þetta er í fyrsta skipti í rúmlega 50 ára sögu torfærunnar að hún er einungis sýnd í beinni útsendingu. Fyrirtækið Skjáskot mun koma keppninni heim í stofu með fjórum myndavélum, myndavélum innan úr bílunum, drónum, lýsendum og öllu tilheyrandi, til þess að gera upplifunina sem allra næst því að vera á staðnum.

Að sögn Kára Rafns Þorbergssonar, keppnisstjóra, er 21 keppandi skráður til leiks í tveimur flokkum.

„Það er þó nokkuð um nýliða og ný smíðaða bíla sem koma sterkir til leiks. Einnig eru nokkrir gamlir Íslandsmeistarar að mæta eftir þónokkuð hlé, þannig að það má búast við harðri baráttu. Sandbrekkurnar, áin og mýrin verða á sýnum stað,“ segir Kári Rafn.

Hægt er að kaupa miða á útsendinguna á www.motorsport.is. Einn heppinn miðakaupandi verður dreginn út og nælir sér í 322 hluta Toptul verkfæraskáp frá Sindra. Útsending hefst uppúr klukkan 9 og keppnin sjálf klukkan 11.

Það eru Flugbjörgunarsveitin á Hellu og akstursíþróttanefnd Umf. Heklu sem standa að keppninni líkt og undanfarin ár.