Ægir fékk Þrótt Reykjavík í heimsókn í kvöld í 1. deild karla í knattspyrnu. Liðin eru að berjast á sitthvorum enda töflunnar, Þróttur í toppsætinu en Ægir í botnbaráttunni.
Þróttarar þurftu heldur betur að hafa fyrir hlutunum í kvöld og þeir lentu undir strax á 8. mínútu þegar Jordan Adeyamo afgreiddi boltann snilldarlega í netið. Eftir það lágu Þróttarar í sókn en fengu lítið annað en hálffæri. Ægismenn voru nær því að bæta við marki en Adeyamo slapp aftur innfyrir á 18. mínútu og skaut rétt framhjá.
Staðan var 1-0 í hálfleik en strax á þriðju mínútu seinni hálfleiks fengu Þróttarar vítaspyrnu og jöfnuðu úr henni. Þróttarar héldu áfram að sækja og á 63. mínútu komust þeir yfir með skallamarki eftir hornspyrnu.
Ægismenn hresstust talsvert á lokakaflanum og reyndu allt hvað af tók að finna jöfnunarmarkið. Það fannst ekki en Þróttarar áttu lokaorðið því þeir skoruðu sitt þriðja mark úr skyndisókn í uppbótartímanum og sigruðu 3-1.
Þróttarar eru á toppi deildarinnar með 21 stig en Ægir í 11. sætinu með 7 stig.