Selfoss fékk topplið Hauka í heimsókn í 2. deild karla í knattspyrnu í kvöld. Niðurstaðan varð 2-2 jafntefli í fjörugum leik.
Haukar fóru betur af stað í leiknum en færin voru af skornum skammti. Selfyssingar vörðust skipulega og Benjamín Jónsson var vel á verði í markinu. Ísinn var þó brotinn á 41. mínútu þegar varnarleikur Selfoss brást og Haukar komust yfir, 0-1 í hálfleik.
Selfyssingar náðu að jafna metin snemma í seinni hálfleik og þar var Eysteinn Ernir Sverrisson að verki með góðu skoti upp úr hornspyrnu. Heimamenn litu vel út í kjölfarið, Jón Daði Böðvarsson átti sláarskot og Viðar Örn Kjartansson komst í hörkufæri áður en Ivan Paponja kom Selfyssingum yfir á 74. mínútu með frábæru skoti fyrir utan teig.
Það voru hins vegar Haukar sem áttu lokaorðið. Þeir fengu hornspyrnu fimm mínútum fyrir leikslok og uppúr henni kom jöfnunarmarkið, 2-2.
Selfoss er í 4. sæti deildarinnar með 16 stig, eins og Kári og Dalvík/Reynir sem eru í 2. og 3. sæti en eiga leik til góða. Haukar eru áfram í toppsætinu með 20 stig.