Framherjinn Hrvoje Tokic hefur yfirgefið herbúðir Knattspyrnufélags Ægis en fotbolti.net greinir frá því að samningi hans hafi verið rift í dag.
Tokic hefur komið við sögu í átta af tólf leikjum Ægismanna í sumar og skorað í þeim tvö mörk. Hann var í byrjunarliðinu og skoraði sigurmark Ægis í fyrsta heimasigri liðsins í sumar, gegn Njarðvík um síðustu helgi.
Félagaskiptaglugginn opnaði í dag og hafa Ægismenn fengið til liðs við sig serbneska framherjann David Bjelobrk og varnarsinnaða miðjumanninn Braima Candé sem er frá Gíneu-Bissá og hefur leikið fyrir yngri landslið Portúgals. Þá hefur Djordje Panic aftur fengið leikheimild með Ægi. Hann lék með Ægi í fyrra en stundar nám í Bandaríkjunum og fer aftur þangað síðsumars.