Hamar/Þór tók á móti Tindastóli í úrvalsdeild kvenna í körfubolta í Þorlákshöfn í kvöld. Eftir góðan fyrri hálfleik heimakvenna fór að síga á ógæfuhliðina og þegar upp var staðið sigraði Tindastóll 79-87.
Leikurinn var jafn í 1. leikhluta, Tindastóll náði mest 7 stiga forskoti en staðan eftir tíu mínútur var 25-27. Hamar/Þór hafði frumkvæðið í 2. leikhluta en leikurinn var jafn en með því að skora síðustu sex stigin í fyrri hálfleik tryggðu þær sunnlensku sér 46-42 forystu í hálfleik.
Hamar/Þór byrjaði vel í seinni hálfleik og náði mest níu stiga forskoti, 62-53, þegar þrjár mínútur voru eftir af 3. leikhluta. Þá svaraði Tindastóll með 17-5 áhlaupi og náði á stuttum tíma að breyta stöðunni í 67-70. Síðustu sex mínútur leiksins gekk Hamri/Þór illa að skora á meðan gestirnir röðuðu niður stigum og að lokum skildu átta stig liðin að.
Jada Guinn var stigahæst hjá Hamri/Þór með 20 stig og ásamt henni var Jovana Markovic framlagshæst, Markovic skoraði 12 stig og tók 9 fráköst.
Hamar/Þór er í botnsæti deildarinnar með 4 stig en Tindastóll er í 8. sæti með 12 stig.
Hamar/Þór-Tindastóll 79-87 (25-27, 21-15, 18-18, 15-27)
Hamar/Þór: Jada Guinn 20/4 fráköst/5 stoðsendingar, Ana Clara Paz 17/5 fráköst, Jovana Markovic 12/9 fráköst, Mariana Duran 12/5 fráköst/6 stoðsendingar, Matilda Sóldís Svan Hjördísardóttir 10, Bergdís Anna Magnúsdóttir 5, Jóhanna Ýr Ágústsdóttir 3.