Hamar, KFR, Árborg og Selfoss eru öll komin í 16-liða úrslit neðrideildarbikars karla í knattspyrnu eftir leiki kvöldsins.
Hamar, KFR og Árborg, sem öll leika í 4. deild, gerðu sér lítið fyrir og slógu út lið úr efri deildum á meðan Selfoss, sem leikur í 2. deild, vann öruggan sigur á 4. deildarliði Hafna.
Dramatíkin var mest í Hveragerði þar sem Hamar fékk 3. deildarlið KF í heimsókn. KF komst yfir á 30. mínútu og staðan var 0-1 í hálfleik. Róðurinn þyngdist hjá Hamarsmönnum þegar Genaro Peresutti fékk að líta rauða spjaldið í upphafi seinni hálfleiks en manni færri tókst þeim að jafna metin. Guido Rancez gerði það á 66. mínútu.
Hamarsmenn héldu út í 90 mínútur og því þurfti að grípa til framlengingar. Hún var markalaus og staðan því 1-1 eftir 120 mínútur. Markvörðurinn Stefán Þór Hannesson reyndist hetja Hamars í vítaspyrnukeppninni en hann varði tvær spyrnur og Hamar sigraði 5-4. Guido Rancez, Unnar Magnússon, Rodrigo Depetris og Tómas Bjartur Björnsson skoruðu allir úr sínum vítaspyrnum.
Það var sömuleiðis gleði á Hellu þar sem KFR fékk 3. deildarlið Víðis í heimsókn. Helgi Valur Smárason kom KFR yfir strax á 5. mínútu og Bjarni Þorvaldsson bætti við öðru marki á 29. mínútu. Staðan var 2-0 í hálfleik og baráttuglaðir Rangæingar slógu Víðismenn heldur betur út af laginu. Seinni hálfleikur var markalaus allt fram á lokamínútuna að Víðir náði að klóra í bakkann en lokatölur leiksins urðu 2-1.
Árborg átti erfitt verkefni fyrir höndum, heimsókn á Samsung-völlinn í Garðabænum þar sem liðið mætti 2. deildarliði KFG. Fyrri hálfleikur var markalaus, KFG var meira með boltann en færin voru fá. Það dró svo til tíðinda á 57. mínútu þegar Þorkell Þráinsson skoraði af stuttu færi eftir hornspyrnu og kom Árborg í 0-1. Garðbæingar gerðu harða hríð að marki Árborgar á lokakaflanum en tókst ekki að skora og Árborg fagnaði 0-1 sigri.
Selfoss heimsótti Hafnir í Reykjaneshöllina og þar var Elías Karl Heiðarsson fyrstur til að skora, á 9. mínútu. Viðar Örn Kjartansson bætti við öðru marki á 17. mínútu og Selfyssingar komnir í nokkuð góð mál. Þeim tókst þó ekki að hrista Hafnir af sér því heimamenn minnkuðu muninn í 1-2 á 38. mínútu og þannig stóðu leikar í hálfleik. Selfoss gerði svo endanlega út um leikinn á 78. mínútu þegar Elías Karl skoraði sitt annað mark og lokatölur urðu 1-3.