Selfoss tók á móti Siglingafélaginu Ými úr Kópavogi í 8-liða úrslitum Gatorate-bikarsins, bikarkeppni neðrideildaliða, á Selfossvelli í kvöld.
Ýmir leikur í 3. deildinni og því um skyldusigur að ræða fyrir Selfyssinga og þeir voru ekkert að tvínóna við hlutina. Viðar Örn Kjartansson skoraði eftir aðeins 22 sekúndur eftir að hafa unnið boltann sjálfur í öftustu víglínu Ýmis og fengið svo stoðsendingu innfyrir frá Frosta Brynjólfssyni.
Hvort markið kom of snemma skal ósagt látið en í kjölfarið var deyfð yfir Selfyssingum og lítið að frétta langt fram í seinni hálfleikinn.
Staðan var 1-0 í hálfleik en á síðustu tíu mínútum leiksins fóru hlutirnir heldur betur að gerast. Á 79. mínútu skoraði Viðar aftur af stuttu færi eftir fyrirgjöf Arons Fannars Birgissonar. Á 86. mínútu náði Gestur Helgi Snorrason boltanum af markmanni Ýmis og skoraði í autt markið og tveimur mínútum síðar innsiglaði Ívan Breki Sigurðsson 4-0 sigur Selfoss þegar hann hljóp upp allan völlinn með boltann og fékk hann síðan innfyrir vörnina frá Viðari Erni.
Selfoss verður því í pottinum þegar dregið verður í undanúrslit keppninnar, ásamt Kormáki/Hvöt og Haukum úr 2. deildinni og Álftanesi úr 4. deildinni.