Þrjú jafntefli á fyrsta degi

Jón L. Árnason, heimsmeistari sveina 1977, lék fyrsta leik mótsins fyrir Dinara Saduakassova gegn Mikhail Antipov, riddari Gunnar 1 til Finnur 3. sunnlenska.is/Guðmundur Karl

Mikhail Antipov og Sergei Zhigalko unnu sínar skákir í 1. umferð heimsmeistaramótsins á afmælisskákhátíð SSON sem hófst á Hótel Selfossi í dag.

Antipov sigraði Dinara Saduakassova en skákin hófst á stórsókn Saduakassova. Taflið snerist hins vegar í höndunum á henni eftir þrettán leiki og Rússinn tók yfirhöndina og hélt henni til loka.

Í skák Zhigalko og Sarasadat Khademalsharieh hafði Zhigalko góð tök á flókinni stöðu á borðinu allan tímann og vann góðan sigur.

Á borði 1 mættust Adly Ahmed, sem er stigahæsti keppandi mótsins, og Helgi Áss Grétarsson. Egyptinn hafði yfirhöndina lengst af en Helgi varðist árásum hans vel. Helgi sneri svo vörn í sókn en Adly varðist örugglega og skákinni lauk með jafntefli.

Hannes Hlífar Stefánsson og Semyon Lomasov gerðu einnig öruggt jafntefli og Héðinn Steingrímsson gerði sömuleiðis jafntefli við Rafael Leitão í skák sem komst aldrei á flug.

Önnur umferð mótsins hefst kl. 17:00 á morgun, miðvikudag, og er teflt í aðalsal Hótel Selfoss.