Selfoss vann glæsilegan sigur á Gróttu í 1. deild kvenna í knattspyrnu á Selfossvelli í dag. Lokatölur urðu 3-0.
Selfoss nýtti styrkleika sína vel í leiknum í dag, voru þéttar til baka og sóttu hratt upp kantana. Þrjár slíkar skyndisóknir skiluðu árangri.
Olga Lind Gestsdóttir kom Selfyssingum yfir á 24. mínútu þegar hún slapp innfyrir og kláraði færið vel. Grótta sótti stíft og Selfoss átti í vök að verjast á köflum en staðan var 1-0 í hálfleik.
Seinni hálfleikurinn var ekki nema fimm mínútna gamall þegar Védís Ösp Einarsdóttir vann boltann á miðjunni og geystist upp vinstra megin, alla leið inn í vítateig og skoraði. Fjórum mínútum síðar fór Olga Lind upp sömu leið hægra megin og kom Selfyssingum í 3-0.
Leikurinn fjaraði út eftir þetta, Grótta hélt boltanum en fékk lítið meira en hálffæri og Selfoss fagnaði sanngjörnum sigri.
Selfoss er í 5. sæti deildarinnar með 10 stig en Grótta í 3. sætinu með 15 stig.