Stokkseyringar eru á miklu skriði í 5. deild karla í knattspyrnu en liðið tók á móti KB á Stokkseyrarvelli í kvöld og vann stórsigur. Á sama tíma tapaði lið Uppsveita fyrir Smára á Laugarvatni.
Stokkseyri kom sér snemma í góða stöðu, Marteinn Maríus Marinósson kom þeim yfir á 9. mínútu og fjórum mínútum síðar skoraði Arilíus Óskarsson úr vítaspyrnu. Tryggvi Sigurberg Traustason og Ingvi Rafn Óskarsson bættu við mörkum áður en flautað var til hálfleiks og staðan var 4-0 í leikhléi.
KB minnkaði muninn með marki úr vítaspyrnu snemma í seinni hálfleik en Hafþór Berg Ríkharðsson jók forskot Stokkseyringa aftur á 77. mínútu. Það var síðan Gunnar Flosi Grétarsson sem átti lokaorðið en hann skoraði sjötta mark Stokkseyringa á 90. mínútu og leiknum lauk með 6-1 sigri heimamanna.
Á Laugarvatni var leikur Uppsveita og Smára í járnum lengi vel. Smári komst yfir á 14. mínútu en Karol Dragowski jafnaði með frábæru aukaspyrnumarki á lokamínútu fyrri hálfleiks. Staðan var 1-1 í leikhléi og lengst af fyrri hálfleik en þegar fimm mínútur voru eftir komust Smáramenn yfir og þeir bættu svo við tveimur mörkum í til viðbótar í uppbótartímanum, lokatölur 1-4.
Í A-riðli 5. deildar eru Uppsveitir í 2. sæti með 9 stig en í B-riðlinum er Stokkseyri í 2. sæti með 10 stig.