Framfarir, hollvinasamtök millivegalengda- og langhlaupara, völdu Selfyssinginn Þorvald Gauta Hafsteinsson efnilegasta hlaupara drengja á árinu 2022 vegna framfara í millivegalengdum og langhlaupum.
Þorvaldur Gauti er 16 ára gamall og keppir fyrir Umf. Selfoss. Hann hefur verið að gera það mjög gott á hlaupabrautinni og viðurkenninguna hlaut hann fyrir bætingu í 800 m hlaupi, upp á 206 IAAF stig. Á árinu 2021 hljóp hann 800 m á tímanum 2:16,40 mín en bætti sig á árinu 2022 í 2:04,96 mín.
Framfarir veita árlega peningastyrk vegna árangurs á hlaupabrautinni og fer afhendingin fram í tengslum við Víðavangshlaup ÍR sem verður haldið á sumardaginn fyrsta.