Selfoss varð af mikilvægum stigum þegar liðið tók á móti Þór Akureyri í úrvalsdeild karla í handbolta í dag. Liðin eru í harðri baráttu um sæti í úrslitakeppninni og Þórsarar höfðu betur í dag, 33-35.
Jafnt var á nánast öllum tölum í upphafi leiks en í stöðunni 5-5 skoruðu Þórsarar þrjú mörk í röð og breyttu stöðunni í 5-8. Selfyssingar svöruðu strax fyrir sig, jöfnuðu 11-11 og staðan var 17-17 í hálfleik.
Seinni hálfleikurinn var í járnum framan af en síðasta korterið stýrðu Þórsarar ferðinni og tryggðu sér að lokum tveggja marka sigur.
Hannes Höskuldsson var markahæstur Selfyssinga með 11/7 mörk, Tryggvi Sigurberg Traustason og Sölvi Svavarsson skoruðu 6, Guðjón Baldur Ómarsson 3, Jason Dagur Þórisson, Anton Breki Hjaltason og Gunnar Kári Bragason 2 og Valdimar Örn Ingvarsson 1.
Alexander Hrafnkelsson varði 5 skot í marki Selfoss og var með 18% prósent markvörslu og Philipp Seidemann varði 4 skot og var með 25% markvörslu.
Þórsarar lyftu sér uppfyrir Selfoss með sigrinum, Þór er með 11 stig í 9. sæti og Selfoss með jafnmörg stig í 10. sætinu.