Hestaíþróttakonan Þórey Þula Helgadóttir er íþróttamaður ársins í Hrunamannahreppi árið 2025. Verðlaunin voru veitt á 17. júní hátíðarhöldunum á Flúðum.
Þórey Þula varð Íslandsmeistari í samanlögðum fjórgangsgreinum ungmenna á heimaræktuðu hryssunni Hröfnu frá Hvammi 1. Þær lentu í 4. sæti í fjórgangi og 7.-8. sæti í tölti, sem er frábær árangur á þessari 7 vetra gömlu meri.
Lýðheilsu- og æskulýðsnefnd Hrunamannahrepps stendur að valinu og í rökstuðningi nefndarinnar segir að Þórey sé búin að sýna það og sanna að hún ætli sér langt í fremstu röð knapa landsins. „Það mátti einnig sjá á Landsmótinu í sumar í A-flokki gæðinga þar sem hún átti afbragðs sýningu á Kjalari frá Hvammi 1. Þá var Þórey sýnileg á íþrótta og gæðingamótum ársins og stóð sig vel. Hún er bæði fyrirmynd innan sem utan vallar og íþróttamaður fram í fingurgóma.“
Aðrir sem tilnefndir voru í kjörinu eru þau sundmaðurinn Arnór Karlson frjálsíþróttakonan Aldís Fönn Benediktsdóttir og körfuknattleiksmaðurinn Eyþór Orri Árnason.