Aðalfundur Hestamannafélagsins Sleipnis og Sleipnishallarinnar ehf. var haldinn í félagsheimilinu Hliðskjálf á Selfossi síðastliðinn þriðjudag.
Á fundinum voru þau Þórdís Ólöf Viðarsdóttir, Guðmundur Árnason og Ragna Gunnarsdóttir gerð að heiðursfélögum, fyrir ómetanlegt og óeigingjarnt starf í þágu félagsins, en þetta er æðsta viðurkenning félagsins.
Þórdís sat í stjórn félagsins 2009 til 2012, þar af sem formaður 2010 til 2012 og leiddi félagið þegar bygging reiðhallarinnar hófst og fór fram. Hún er nú gjaldkeri reiðhallarnefndar og hefur sinnt reikningum, uppgjörum og ársskýrslum Sleipnishallar af mikilli nákvæmni og ábyrgð síðan 2016.
Guðmundur er öðrum fyrirmynd í sjálfboðaliðastarfi og ávallt tilbúinn að leggja hönd á plóg í fjölbreyttum verkefnum á vegum félagsins auk þess sem hann hefur lagt til tæki og tól þegar þörf hefur verið á. Ragna veigrar sér heldur aldrei við að leggja hönd á plóg þegar verkefni kalla og verið afar liðtæk í sjálfboðaliðastarfinu. Hún hefur verið mjög virk í nefndarstörfum, m.a. í skemmtinefnd, kvennakvölds- og kvennareiðsnefnd auk þess sem hún hefur sinnt formennsku í reiðhallarnefnd. Auk þess hafa Guðmundur og Ragna stutt við félagið á ýmsan hátt í gegnum fyrirtæki sitt Baldvin & Þorvald um langt árabil.
Breytingar á stjórn og samningur við Árborg endurnýjaður
Breytingar urðu á stjórn Sleipnis á aðalfundinum. Linda Björgvinsdóttir og Guðmundur Árnason komu ný inn aðalstjórn í stað Solveigar Pálmadóttur og Elísabetar Sveinsdóttur, en Elísabet var kjörin í varastjórn. Berglind Sveinsdóttir formaður og Bryndís Guðmundsdóttir buðu sig fram til áframhaldandi setu og voru báðar endurkjörnar.
Þá var undirritaður á fundinum þjónustusamningur til fimm ára milli Sveitarfélagsins Árborgar og Sleipnis. Samningurinn markar mikilvægt skref í áframhaldandi og öflugu samstarfi aðila. Bragi Bjarnason, bæjarstjóri og Berglind formaður undirrituðu samninginn.
