Lokakaflinn í leik Þórs Þorlákshöfn gegn Þór Akureyri í 1. deild kvenna í körfubolta var æsispennandi. Liðin mættust á Akureyri í dag og höfðu Þorlákshafnarkonur betur að lokum, 80-82.
Heimakonur byrjuðu leikinn af krafti og komust í 11-2. Þór Þ hristi af sér hrollinn eftir það og minnkaði muninn í 3 stig en staðan var 23-20 eftir 1. leikhluta. Liðin skiptust á um að hafa frumkvæðið í 2. leikhluta en Þór Þ skoraði síðustu sjö stigin í fyrri hálfleik og staðan var 39-41 í leikhléi.
Skriðþungi Þorlákshafnarkvenna hélt áfram í upphafi seinni hálfleiks, þær skoruðu fyrstu tíu stigin í 3. leikhluta og voru komnar í vænlega stöðu. En Akureyringar létu það ekki á sig fá og svöruðu með sex stiga áhlaupi undir lok 3. leikhluta.
Þór Þ hafði sex stiga forskot þegar tvær mínútur voru liðnar af 4. leikhluta en Þór Ak svaraði með sjö stigum í röð og eftir það skiptust liðin á um að hafa forystuna. Leikurinn var hnífjafn síðustu fimm mínúturnar en þegar sjö sekúndur voru eftir setti Shawnteanna Tillman niður tvö vítaskot fyrir Þór Þ og tryggði þeim sigurinn.
Þór Ak.-Þór Þ. 80-82 (23-20, 16-21, 19-19, 22-22)
Tölfræði Þórs Þ: Shawnteanna Tillman 34/13 fráköst/9 stoðsendingar/7 stolnir, Antoaneta Alexe 23/7 fráköst, Jóhanna Ýr Ágústsdóttir 9/5 fráköst/5 stoðsendingar, Thea Ólafía Lucic Jónsdóttir 8, Jara Björg Gilbertsdóttir 6/6 fráköst, Dagrún Inga Jónsdóttir 2.