Þrátt fyrir magnaðan sigur á Njarðvík í kvöld eru Þorlákshafnar-Þórsarar ennþá í fallsæti í úrvalsdeild karla í körfubolta. Þór vann Njarðvík 109-72 en á sama tíma vann Ármann ótrúlegan sigur á toppliði Grindavíkur, 103-87.
Ármenningar eru með 12 stig í 10. sæti, eins og Þórsarar sem eru í 11. sætinu en Ármann hefur betur innbyrðis. Til að halda sæti sínu í deildinni þarf Þór að sigra topplið Grindavíkur í lokaumferðinni og treysta á að Ármann tapi á sama tíma fyrir ÍA, en Skagamenn eru þegar fallnir úr deildinni.
Leikurinn í Þorlákshöfn í kvöld var hin besta skemmtun. Þórsarar byrjuðu vel og staðan var 51-43 í hálfleik. Seinni hálfleikurinn var einstefna Þórsara, sem voru í bílstjórasætinu allan tímann og unnu öruggan sigur að lokum.
Djordje Dzeletovic var stigahæstur Þórsara með 26 stig, 6 fráköst og 5 stoðsendingar en Lazar Lugic var framlagshæstur með 24 stig og 4 fráköst.
Þór Þ.-Njarðvík 109-72 (29-20, 22-23, 25-18, 33-11)
Tölfræði Þórs: Djordje Dzeletovic 26/6 fráköst/5 stoðsendingar, Lazar Lugic 24/4 fráköst, Dachon Burk 20/9 fráköst/8 stoðsendingar, Rafail Lanaras 10/5 fráköst, Ísak Júlíus Perdue 8, Skarphéðinn Árni Þorbergsson 6, Emil Karel Einarsson 5/4 fráköst, Baldur Böðvar Torfason 5, Haukur Davíðsson 4, Tristan Alexander Szmiedowicz 1.