Þakka Gunnari fyrir að koma mér í stand

Jón Daði fær óblíðar móttökur hjá Merih Demiral og Zeki Çelik í vörn Tyrkja. sunnlenska.is/Guðmundur Karl

Selfyssingurinn Jón Daði Böðvarsson spilaði frábærlega þegar íslenska landsliðið í knattspyrnu lagði Tyrki að velli á Laugardalsvellinum í kvöld, 2-1.

Jón Daði var í byrjunarliðinu og spilaði 63 mínútur í leiknum en hann hefur lítið spilað með félagsliði sínu á þessu ári eftir að hafa glímt við meiðsli í vetur.

„Þetta var æðislegt. Það er auðvitað ógeðslega langt síðan ég fékk að spila síðast. Ég spilaði síðast deildarleik í febrúar. Maður saknar þess að snerta fótbolta og vera aftur á grasinu, þá sérstaklega á Laugardalsvellinum,” sagði Jón Daði Böðvarsson, í samtali við fjölmiðla eftir leik.

Þrátt fyrir að hafa lítið spilað segist Jón vera í góðu formi en hann æfði meðal annars á Selfossi í aðdraganda landsliðsverkefnanna síðustu dag.

„Ég fór beint eftir tímabilið á Selfoss og hef verið að æfa þar með Gunnari Borgþórssyni, maður verður að gefa honum shout-out meðan maður er að tala við ykkur. Ég þakka honum fyrir að koma mér í stand og síðan hef ég verið að æfa vel með landsliðinu, síðan var maður klár í þetta,” sagði Jón Daði. 

Það gekk mikið á í aðdraganda landsleiksins gegn Tyrkjum. Hótunum rigndi yfir Íslendinga á samfélagsmiðlum og hakkarar gerðu árásir á íslenskar vefsíður, meðal annars sunnlenska.is. Landsliðsmönnunum bárust líka ýmsar ljótar hótanir.

„Já, ég fékk helling af þessum hótunum. Ég nennti ekki að skoða þetta,“ sagði Jón Daði ennfremur.

Viðtal við Jón Daða á fotbolti.net