Árborg tapaði 2-3 þegar liðið fékk Berserki í heimsókn í 3. deild karla í knattspyrnu í kvöld.
Leikurinn var jafn í fyrri hálfleik og bæði lið áttu góð færi áður en gestirnir komust yfir með marki úr skyndisókn á 43. mínútu.
Staðan var 0-1 í hálfleik en Árborg komst yfir með tveimur mörkum á þremur mínútum í upphafi seinni hálfleiks. Fyrst skoraði Páll Óli Ólason eftir hornspyrnu og þremur mínútum síðar fór Kjartan Kjartansson á vítapunktinn og kom Árborg í 2-1.
Heimamenn voru steinsofandi þegar Berserkir jöfnuðu leikinn á 64. mínútu eftir aukaspyrnu utan af kanti þar sem einn Berserkjanna var óvaldaður í teignum.
Allt leit út fyrir 2-2 jafntefli en á 87. mínútu áttu Berserkir háa og „misheppnaða“ fyrirgjöf inn í teig sem Aron Leifsson í marki Árborgar misreiknaði og missti yfir sig í stöngina og inn.
Þar við sat og Árborg missti þarna af dýrmætu stigi í hinum hnífjafna A-riðli.