Það er sannkallaður stórleikur framundan á Selfossvelli kl. 19:00 í kvöld þegar Selfoss og Árborg mætast í 16-liða úrslitum Gatorade bikarsins, bikarkeppni neðrideildarliða.
Selfoss leikur í 2. deild Íslandsmótsins og Árborg í 4. deildinni en þetta verður í fyrsta skipti í sögunni sem liðin mætast í opinberum knattspyrnuleik. Félögin hafa átt í áralöngu, farsælu samstarfi en fjöldi leikmanna frá Selfossi hafa spilað með báðum félögum.
Leikurinn er styrktarleikur fyrir fjölskyldu Helgu Guðmundsdóttur en að ósk Helgu mun allur ágóði leiksins renna óskertur til heimahjúkrunar Heilbrigðisstofnunar Suðurlands á Selfossi. Helga, sem er móðir Arons Fannars Birgissonar, leikmanns Selfoss og fyrrum leikmanns Árborgar, lést síðastliðinn mánudag eftir baráttu við krabbamein og verður mínútu þögn áður en flautað verður til leiks í kvöld til þess að minnast Helgu. Hún var dyggur stuðningsmaður beggja félaga.
Fyrir leikinn verður dagskrá á Selfossvelli sem hefst kl. 18:00. Leikmenn handknattleiksfélagsins Mílunnar munu standa vaktina á grillinu og ágóðinn af sölunni rennur einnig til heimahjúkrunar HSU. Börnin frá ís frá Kjörís og klukkan 18:15 munu þjálfarar liðanna kynna liðin sín í Tíbrá. Að því loknu mun Guðmundur Karl Sigurdórsson, fyrrum vallarþulur, opinbera úrvalslið leikmanna sem hafa leikið með báðum félögunum.
Flautað verður til leiks kl. 19:00 og í hálfleik verður dagskrá með knattþrautum og skemmtilegheitum auk þess sem happdrætti verður í gangi á meðan á leiknum stendur með glæsilegum vinningum.
Miðasala á leikinn er hér Lágmarksmiðaverð er 2000 krónur en í boði er að greiða hærri upphæð fyrir miðann og hvetjum við þau sem eru aflögufær að gera það.
