Meistaramót Íslands í víðavangshlaupum fór fram í Laugardalnum í Reykjavík síðastliðinn laugardag. Níu keppendur af sambandssvæði HSK tóku þátt í mótinu og komust sex þeirra á verðlaunapall.
Sveinn Skúli Jónsson varð Íslandsmeistari í flokki 15-17 ára pilta og þar varð Veigar Þór Víðisson í 3. sæti. Þeir keppa báðir fyrir Garp/Heklu.
Systir Sveins Skúla, Svanborg Jónsdóttir, Garpi/Heklu, varð Íslandsmeistari í flokki 15-17 ára stúlkna en Sunnlendingar unnu þrefaldan sigur í þessum flokki. Herdís Björg Jóhannsdóttir, Garpi/Heklu, varð í 2. sæti og Dýrleif Nanna Guðmundsdóttir, Umf. Selfoss, í 3. sæti.
Þá vann Vikar Reyr Víðisson, Garpi/Heklu, silfurverðlaun í flokki 13-14 ára.
Í víðavangshlaupi er hlaupið á grasi og malarstígum í hæðóttri braut. Flokkar 15-17 ára hlupu 4 km og flokkar 13-14 ára 2 km.
