Árlega útnefnir Héraðssambandið Skarphéðinn öðling ársins en viðurkenningin er veitt fyrir ástundun og árangur í keppni á árum áður og félagsstörf og alúð við íþróttir fram eftir aldri. Að þessu sinni kom viðurkenningin í hlut Svans Ingvarssonar, Umf. Selfoss og Íþf. Suðra.
Svanur tók við viðurkenningunni á héraðsþingi HSK á Borg í Grímsnesi í síðustu viku og flutti skemmtilegt ávarp við þetta tækifæri.
Svanur fæddist í Vestmannaeyjum 1963, byrjaði snemma að stunda íþróttir, og var farinn að æfa sund 8-9 ára gamall í Eyjum. Hann á ennþá sín fyrstu verðlaun frá þessum tíma og mætti með þau á þingið, forláta útskorið stundaglas, sem hentaði vel til að mæla tímann á ræðu hans á þinginu.
Eftir gosið á Heimaey 1973 flutti fjölskyldan á Selfoss og þar var fljótlega farið að leggja stund á bæði sund og frjálsíþróttir. Á endanum varð sundið fyrir valinu og var Svanur ásamt Þresti bróður sínum í gullaldarliði sunddeildar Selfoss sem varð meðal annars bikarmeistari árið 1981.
Þegar Svanur var 26 ára lenti hann í vinnuslysi og lamaðist frá mitti, sem markaði í raun nýtt tímabil í íþróttunum hjá honum og í félagsmálunum. Tæpu ári eftir slysið var hann mættur til keppni í sundi á stórum leikum fatlaðra á Englandi.
Svanur varð fyrstur Íslendinga til að keppa bæði á sumar- og vetrarólympíumótum fatlaðra en hann keppti í sundi í Barcelona 1992 og í sleðastjaki í Lillehammer 1994. Hann var fyrsti Íslendingurinn sem keppti á vetrarleikum fatlaðra.
Félagsmálaforkólfur
Svanur hefur alla tíð verið mjög virkur í félagsmálunum og er enn að. Hann var lengi formaður sundnefndar HSK, næstum eitt ár framkvæmdastjóri HSK og framkvæmdastjóri Íþróttahátíðar HSK í Reykholti. Árum saman var hann þulur á nær öllum sundmótum sem haldin voru á HSK svæðinu og starfar enn á flestum frjálsíþróttamótum á Selfossi. Hann var um tíma í stjórn Sundsambands Íslands. Svanur hafði frumkvæði að því að endurreisa starf Suðra og var formaður félagsins í nokkur ár. Hann er og hefur verið frá upphafi í jólasveinanefnd Umf. Selfoss, eða í 49 ár.
Svanur var sæmdur fálkaorðunni þann 17. júní 2024 fyrir framlag sitt í þágu íþróttastarfs fatlaðra. Hann hefur hlotið heiðursviðurkenningar fyrir störf sín og framlag til íþróttamála innan hreyfingarinnar, s.s. gullmerki ÍSÍ, gullmerki HSK, gullmerki ÍF, gullmerki Umf. Selfoss og starfsmerki UMFÍ.
Það er sögu- og minjanefnd HSK sem gerir tillögu til stjórnar HSK um val á öðlingi ársins og í ár var nefndin einhuga um að tilnefna Svan.