Það var gott kvöld fyrir sunnlensku liðin í 4. deild karla í knattspyrnu í kvöld, Hamar, Árborg og KFR sigruðu öll í sínum leikjum.
Hamar lenti undir strax á 5. mínútu gegn Vængjum Júpíters í Grafarvoginum en Hvergerðingar svöruðu vel fyrir sig. Guido Rancez jafnaði metin á 25. mínútu og strax í kjölfarið kom Tómas Bjartur Björnsson þeim yfir. Staðan var 1-2 í hálfleik. Hamarsmenn voru sterkari í seinni hálfleik, Rodrigo Depetris, Guido Rancez og Brynjólfur Þór Eyþórsson bættu allir við mörkum og leiknum lauk með 1-5 sigri Hamars.
Árborg hafði yfirburði gegn ÍH í fyrri hálfleik en liðin mættust í Skessunni í Hafnarfirði. Gestur Helgi Snorrason kom Árborg yfir á 36. mínútu og staðan var 0-1 í hálfleik. Adam Örn Sveinbjörnsson tvöfaldaði forskotið á 53. mínútu með marki af eigin vallarhelmingi en í kjölfarið tók ÍH hressilega við sér. Þeir minnkuðu muninn á 61. mínútu en Árborg hélt út og sigraði 1-2.
KFR heimsótti Álafoss að Varmá í hörkuleik. Rangæingar fóru illa með færin í fyrri hálfleik og Álafoss varð á undan að skora. Þeir komust yfir á 39. mínútu og staðan var 1-0 í hálfleik. Helgi Valur Smárason jafnaði metin um miðjan seinni hálfleikinn með marki úr vítaspyrnu og Hákon Kári Einarsson rak smiðshöggið á 1-2 sigri KFR með góðu marki á 82. mínútu.
Staðan í deildinni er þannig að Árborg er á toppnum með 13 stig og Hamar í 2. sæti með 12 stig, eins og Álftanes sem er í 3. sæti en á leik til góða. KFR er í 6. sæti með 6 stig.