Sunnlendingar náðu góðum árangri á Íslandsmóti yngri í judo sem fram fór á dögunum í aðstöðu judodeildar Ármanns í Laugardal.
Í kvennaflokki U21 mættust í úrslitum þær Ella Rogge, Umf. Selfoss, og Agla Ósk Ólafsdóttir, Judofélagi Suðurlands. Agla Ósk sigraði nokkuð örugglega og tók gullið þó að Ella ætti góða spretti.
Arnar Helgi Arnarsson, Judofélagi Suðurlands, vann silfurverðlaun í U21 flokki karla en hann mætti Viktori Kristmundssyni, JR, í úrslitum.
Franz Smárason, Umf. Selfoss, vann gullverðlaun í -34 kg flokki drengja U13 og Stefán Úlfarsson, Umf. Selfoss, hlaut brons. Steinunn Heba Atladóttir, Umf. Selfoss, vann gullverðlaun í -42 kg flokki stelpna U13 og Helga Birgisdóttir, Umf. Selfoss, tók silfrið. Þá vann Írena Arnardóttir, Umf. Selfoss, gullverðlaun í -36kg flokki stelpna U13 ára og Erna Elmarsdóttir, Umf. Selfoss, hreppti silfrið.
Adrian Sindrason, Umf. Selfoss, fékk silfurverðlaun í flokki -90 kg drengja U15 og Dynþór Halldórsson, Umf. Selfoss, fékk brons í undir 42 kg flokki drengja U15.
