„Það vakti athygli okkar hvað iðkendur á Suðurlandi eru einstaklega ánægðir með íþróttastarfið, þjálfarana sína, æfingafjölda og almennt allt sem við kemur íþróttum,“ segir Aldís Baldursdóttir, verkefnastjóri UMFÍ. Hún var á Selfossi á dögunum þegar viðburðurinn Raddir ungs fólks fór þar fram í Fjölbrautaskóla Suðurlands.
Viðburðurinn Raddir ungs fólks gegnir lykilhlutverki í þróun íþróttahreyfingarinnar á Íslandi. Með því að safna saman ungu fólki á aldrinum 15–25 ára og fá fram þeirra sjónarmið í skipulögðu samtali við stjórnendur og fagfólk skapast dýrmæt innsýn í þarfir og væntingar iðkenda.
Viðburðirnir hófust á Austurlandi í byrjun mars og hafa verið haldnir í hverjum landshluta síðan þá, alls átta fundir. Fundarröðin var styrkt af Erasmus+, styrkjaáætlun Evrópusambandsins (ESB).
Handboltakappinn Ólafur Stefánsson hefur mætt á alla viðburðina með erindi um íþróttir og gildi þeirra. Á Selfossi tók hann sömuleiðis virkan þátt í samræðum og vinnu hópa þar sem fjallað var um leiðir til að sporna gegn brottfalli ungs fólks úr skipulögðu íþróttastarfi, hvað gera megi betur í íþróttahreyfingunni, hvernig ná megi betur til barna og ungmenna af tekjulægri heimilum og með erlendan bakgrunn.
Aldís, sem kemur frá Flóahreppi, segir hópinn sem mætti á Selfossi hafa verið fjölbreyttan og komið víða að. Þar á meðal frá Hvolsvelli og alla leið frá Kirkjubæjarklaustri auk Selfoss, Hveragerði og Þorlákshöfn og öðrum svæðum í Árborg.
