Bikarkeppni 15 ára og yngri í frjálsum íþróttum fór fram á ÍR-vellinum í Breiðholti síðastliðinn laugardagi. Eitt stúlknalið og tvö strákalið frá HSK/Selfoss mættu til leiks. Að þessu sinni sameinuðust Sunnlendingarnir Héraðssambandinu Hrafna-Flóka á sunnanverðum Vestfjörðum og keppti liðið því undir merkjum HHF/HSK-Selfoss á mótinu.
Fjölmargir titlar náðust og skilaði það liðinu öðru sæti í bikarkeppninni sem er frábær árangur. Góð stemming var í hópnum og keppnisaðstæður mjög góðar.
Stúlkurnar enduðu í fjórða sæti í heildarstigakeppninni, rétt á eftir þriðja sætinu. Ásta Kristín Ólafsdóttir, Selfossi, varð örugglega bikarmeistari í spjótkasti með góðri bætingu er hún kastaði 44,44m og varð svo í þriðja sæti í kúluvarpi. Magnea Furuhjelm Magnúsdóttir, Dímon, vann báðar sínar greinar, 80 m grindahlaup á 12,82 sek og langstökk með 5,14 m. Filippía Brynjarsdóttir, Selfossi varð svo þriðja í kringlukasti er hún kastaði 18,70 m.
A-lið pilta varð í 3. sæti í heildarstigakeppninni og fylgdi B-liðið næst þar á eftir, í fjórða sæti, sem er frábær árangur. Birkir Aron Ársælsson, Selfossi, bætti sig í spjótkasti er hann kastaði 44,55 m og sigraði og með þeim árangri náði hann inn í landsliðshóp unglinga. Kristján Karl Gunnarsson, Selfossi, kastaði næstlengst í keppninni, 39,76 m, og tryggði þar B liðinu mikilvæg stig. Magnús Tryggvi Birgisson, Selfossi sigraði kringlukastið með 38,58 m löngu kasti og varð svo í 3. sæti í langstökkinu með 5,20 m.