Selfosskonur léku sinn fyrsta leik í Lengjubikarnum í knattspyrnu þetta vorið þegar þær heimsóttu HK í Kórinn í Kópavogi í dag.
HK komst yfir eftir fimmtán mínútna leik en Embla Dís Gunnarsdóttir jafnaði metin þegar hún slapp innfyrir á 27. mínútu. Þremur mínútum síðar komst HK aftur yfir og staðan var 2-1 í hálfleik.
Það gekk lítið upp hjá Selfyssingum í seinni hálfleiknum á meðan HK raðaði inn mörkum. Heimakonur skoruðu fimm mörk á 23 mínútna kafla og lokatölur urðu 7-1.
Selfoss mætir Keflavík um næstu helgi en aðrir mótherjar þeirra í riðlinum eru Grótta, Haukar, KR og ÍA.