„Styrkti liðið að Guðbrands var ekki með“

Karl Larsen, liðsstjóri Selfossliðsins, var ánægður með sigurinn gegn Grindavík og sagði að þær áherslubreytingar sem hann gerði fyrir leik hafi skilað sér fullkomlega.

„Við litum mjög vel út í dag og það er alveg óhætt að segja að liðið hafi verið undir miklum áhrifum frá mér,“ sagði Karl sem vann sæti í liðsstjórninni á uppboði hjá knattspyrnudeildinni fyrir tímabilið. Karl reiddi fram litlar 40 þúsund krónur fyrir að fá að sitja við hliðina á Guðmundi Benediktssyni í einn leik og það virtist skila sér í dag.

„Já, við Gummi náðum vel saman og ég kom mínum áherslum til skila til hans. Það var lykilatriði að koma Jóni Daða inn á miðjuna og það skilaði sér í blússandi sóknarleik. Það kom aldrei til greina að lúta í gras hérna í dag, það er næsta víst,“ sagði Karl. „Menn þorðu ekki annað en að gefa sig alla í leikinn því kallinn var grimmur að hóta skiptingum þegar menn voru ekki að standa sig. Enda fóru mörkin að detta inn eftir það.“

Selfyssingar spiluðu einn sinn besta leik í sumar í dag og Karl vill meina að menn hafi spilað meira með hjartanu heldur en oft áður. „Svo spillti ekki fyrir að Jón Guðbrands var í leikbanni. Það var greinilegt að það styrkti liðið að hann var ekki með,“ sagði Karl, alvarlegur að lokum.