Fjóla Signý Hannesdóttir, eigandi Run2 ehf., sem bæði rekur heildverslun og íþróttavöruverslunina Fætur Toga, hefur styrkt íþróttafólk í fimm íþróttafélögum á landinu með nýjum íþróttaskóm.
Iðkendur og þjálfarar í meistaraflokkum fimm liða fengu að þessu sinni skópar frá Brooks að eigin vali, en heildarupphæð styrksins til félaganna nemur rúmlega 13 milljónum króna.
Hágæða skór geta hjálpað íþróttafólki að ná betri árangri
„Ef maður getur styrkt eða hjálpað til á maður að gera það. Sjálf var ég íþróttakona sem hafði ekki efni á að kaupa mér góða skó og leitaði allra leiða til að skrapa saman fyrir keppnisferðum, t.d með því að selja rabarbara úr sveitinni,“ segir Fjóla Signý og bætir við að hún viti vel hversu mikið hágæða skór geti hjálpað íþróttafólki ná betri árangri.
Hún nefnir til dæmis hversu þakklát hún var sjálf eftir að hafa fengið skó í styrk frá innflutningsaðila Brooks á sínum tíma. „Ég vildi að ég gæti gefið meira en ég er búin að fara núna rúmlega yfir það sem ég get gefið, að minnsta kosti þetta árið.“
Hefur alltaf keppt undir merkjum Selfoss
Ungmennafélag Selfoss var eitt þeirra félaga sem Fjóla Signý styrkti en það er hennar félag en hún hefur alla tíð keppt undir merkjum Selfoss í frjálsum íþróttum. „Íþróttirnar hafa komið mér á þann stað sem ég er í dag og er ég því að reyna að gefa eitthvað til baka,“ segir Fjóla Signý að endingu.
Félögin sem fengu styrk eru:
– Meistaraflokkur Selfoss í frjálsíþróttum
– Meistaraflokkur Selfoss í fimleikum
– Meistaraflokkur Selfoss í fótbolta, bæði konur og karlar
– Meistaraflokkur Selfoss í handbolta bæði konur og karlar
– Meistaraflokkur Grindavíkur í fótbolta bæði konur og karlar
– Meistaraflokkur Vals í handbolta bæði konur og karlar
– Meistaraflokkur Vals í fótbolta bæði konur og karlar
– Meistaraflokkur ÍR í handbolta bæði konur og karlar
– Meistaraflokkur KR í fótbolta bæði konur og karlar