Ægir heimsótti Þrótt Reykjavík í kvöld í síðasta útileik liðsins í 1. deild karla í knattspyrnu í sumar. Þróttarar reyndust mun sterkari og unnu stórsigur.
Þróttur komst í 2-0 á fyrstu tólf mínútum leiksins en Ægismenn nýttu sínar fáu sóknir vel í kjölfarið og Sigurður Óli Guðjónsson og Bjarki Rúnar Jónínuson náðu að jafna metin þegar rúmur hálftími var liðinn. Þróttarar áttu hins vegar lokaorðið í fyrri hálfleik og staðan var 3-2 í leikhléi.
Seinni hálfleikurinn var erfiður fyrir Ægismenn. Þróttur komst í 6-2 á tíu mínútna kafla um miðjan seinni hálfleikinn og þeir bundu svo lokahnútinn í 7-2 sigri með marki á 76. mínútu.
Ægismenn eru sem fyrr á botni deildarinnar með 8 stig en Þróttur er í 2. sæti með 40 stig.