Selfoss vann stórsigur á Þór Akureyri í lokaumferð deildarkeppninnar í 1. deild karla í körfubolta í kvöld. Lokatölur í Vallaskóla urðu 121-86.
Selfyssingar voru sterkari aðilinn allan tímann, staðan var 63-45 í hálfleik og munurinn jókst hratt í 3. leikhluta. Staðan var 90-58 þegar 4. leikhluti hófst og sigur Selfyssinga aldrei í hættu.
Birkir Máni Sigurðarson var framlagshæstur Selfyssinga með 26 stig og 5 fráköst og Ari Hrannar Bjarmason átti sömuleiðis góðan leik, skoraði 16 stig, tók 5 fráköst og sendi 6 stoðsendingar.
Selfoss lauk deildarkeppninni í 8. sæti með 20 stig en Þórsarar urðu í 10. sæti með 8 stig. Selfoss mætir Haukum í 8-liða úrslitum 1. deildarinnar, þar sem spilað er um laust sæti í úrvalsdeildinni. Fyrsti leikur liðanna verður laugardaginn 28. mars á Ásvöllum. Aðrar viðureignir í 8-liða úrslitunum eru Sindri-Snæfell, Fjölnir-KV og Breiðablik-Skallagrímur.
Selfoss-Þór Ak. 121-86 (32-24, 31-21, 27-13, 31-28)
Tölfræði Selfoss: Birkir Máni Sigurðarson 26/5 fráköst, Steven William Lyles 18/4 fráköst/6 stoðsendingar, Ari Hrannar Bjarmason 16/5 fráköst/6 stoðsendingar, Tristan Máni Morthens 13/5 fráköst, Gísli Steinn Hjaltason 11, Fjölnir Morthens 10, Halldór Halldórsson 8, Hafþór Gylfason 6, Óðinn Freyr Árnason 5/4 fráköst, Kristijan Vladovic 4/7 fráköst/6 stoðsendingar, Collin Pryor 2/6 fráköst, Sigurður Darri Magnússon 2.