Stórkostleg jólasýning fimleikadeildar Selfoss

Ljósmyndir: Umf. Selfoss/Inga Heiða

Jólasýning fimleikadeildar Umf. Selfoss sem að þessu sinni byggði á Disneyævintýrinu Vaiana, var sýnd þrisvar sinnum fyrir fullu húsi í íþróttahúsi Vallaskóla síðastliðinn laugardag.

Það er óhætt að segja að sýningargestir hafi skemmt sér konunglega og allir sem komu að sýningunni voru í skýjunum með daginn.

Það er mikil reynsla sem iðkendur öðlast við þátttöku á sýningu sem þessari en aðalhlutverk að þessu sinni voru í höndum stelpnanna í 1. flokki sem leiddu sýninguna út í gegn.

Inga Heiða Heimisdóttir festi allar sýningarnar á filmu og má skoða myndirnar á fésbókarsíðunni Selfoss fimleikamyndir. Allar myndir af sýningunum eru til sölu og fást fyrir kr. 750 í prentupplausn til að gleðja t.d. ömmu og afa eða bara á vegginn hjá fimleikabarninu. Allur ágóði af sölu myndanna rennur í fræðslusjóð fimleikadeildar Selfoss sem nýtist bæði iðkendum og þjálfurum.

Fimleikadeild Selfoss vill koma á framfæri þökkum til allra þeirra sem lögðu sýningunni lið þjálfurum, stjórn, foreldrum, fyrirtækjum og öðrum velunnurum og síðast en ekki síst fá börnin þakkir fyrir frábæra frammistöðu.