Það verður sannkölluð hátíð fyrir íslenskt mótorhjólaáhugafólk þegar Trans Atlantic Offroad Challenge / Flúðir Fimm Tímar fer fram í Syðra-Langholti í Hrunamannahreppi næstkomandi laugardag, þann 30. maí.
Keppnin hefur verið haldin nær óslitið hér á landi frá árinu 2002 og hefur á þeim tíma fest sig í sessi sem einn stærsti og virtasti viðburður íslensks mótorsports síðustu tvo áratugi. Með öflugri blöndu af þolkeppni, adrenalíni, útivist og einstakri stemningu hefur mótið orðið árlegur hápunktur hjá bæði keppendum og áhugafólki um enduro- og offroad sport. Frítt er inn á viðburðinn í ár. Ræst verður klukkan 12:00 og flaggað út klukkan 17:00.
200 keppendur í frábærri braut
Alls munu um 200 keppendur takast á við krefjandi fimm tíma þolakstur þar sem reynir á bæði úthald, aksturshæfni, liðsvinnu og vélbúnað. Keppnin fer fram við frábærar aðstæður í Syðra-Langholti, þar sem fjölbreytt landslag svæðisins skapar einstaka braut með hraða köflum, mold, graslendi, torfærusvæðum og mögulegum sandköflum niður við ána ef aðstæður leyfa.
Undirbúningur stendur nú sem hæst og hefur stór hópur sjálfboðaliða unnið að brautarlagningu og skipulagi síðustu vikur. Markmiðið er að skapa eitt glæsilegasta keppnissvæði sem sést hefur í íslensku enduro-sporti.
Sterkir erlendir keppendur
Sterk alþjóðleg þátttaka verður í ár þar sem bæði innlendir og erlendir toppökumenn mæta til leiks. Meðal keppenda er Zach Osborne, einn þekktasti motocross- og supercrossökumaður Bandaríkjanna á síðasta áratug. Osborne er margfaldur AMA-meistari í motocrossi og hefur einnig keppt víða í Evrópu undanfarin ár. Á síðari árum hefur hann verið afar öflugur í GNCC- og offroad/enduro-keppnum og verður því gríðarlega spennandi að sjá hann takast á við íslenskar aðstæður.
Einnig mætir ítalski endurokappinn Alex Salvini, einn virtasti ökumaður Evrópu í enduroheiminum og fyrrum heimsmeistari í EnduroGP. Salvini hóf feril sinn í motocrossi áður en hann færði sig yfir í enduro þar sem hann hefur skipað sér meðal fremstu ökumanna heims með glæsilegum árangri.
Að fá bæði Zach Osborne og Alex Salvini til Íslands sömu helgina er einstakur viðburður fyrir íslenskt mótorsportssamfélag og staðfestir enn frekar þá stöðu sem Trans Atlantic Offroad Challenge hefur skapað sér á alþjóðlegum vettvangi.
Boðið verður upp á fjölmarga keppnisflokka þannig að bæði vanir keppendur og þeir sem vilja einfaldlega upplifa ævintýrið geti fundið flokk við sitt hæfi. Hvort sem markmiðið er að berjast um efstu sæti eða njóta stemningarinnar verður dagurinn bæði krefjandi og eftirminnilegur.
Meira en bara keppni
Viðburðurinn hefur þróast í að vera árleg samkoma fjölskyldna, vina og áhugafólks um mótorsport þar sem útilegan, samveran og stemningin skipa jafn stóran sess og sjálf keppnin. Svæðið mun lifna við alla helgina þar sem keppendur, lið og áhorfendur njóta þess að upplifa einn stærsta offroad-viðburð ársins saman.