Vormót HSK í frjálsum íþróttum fer fram á Selfossvelli á morgun, fimmtudag. Þar er fjöldi keppenda skráður til leiks, bæði ungir og óreyndir og einnig nokkur af öflugustu frjálsíþróttamönnum landsins.
Á völlinn mæta þrír Íslandsmethafar þau Kolbeinn Höður Gunnarsson sem keppir í 100 m hlaupi, Irma Gunnarsdóttir keppir í þrístökki og Hera Christensen keppir í kringlukasti auk þess sem HM-farinn Christina Alba Marcus Hafliðadóttir er skráð í 100 m hlaup. Þau stefna öll á að reyna að ná lágmarki á Evrópumeistaramótið í Birmingham í ágúst en Ísland er nú þegar komið með fjóra keppendur sem hafa náð lágmarki á mótið.
Vormót HSK er skráð sem Global Calendar mót og því gildir árangur af mótinu sem lágmark á stórmót.
Búast má við því að HSK keppendur verði einnig á góðri siglingu miðað við metin sem féllu á Maímóti Selfoss um daginn og hver veit nema einhver HSK keppandi nái að hlaupa, stökkvaðeða kasta sér inn á einhver alþjóðleg mót með árangri sínum á morgun.
Jónshlaupið fer fram í 41. sinn á mótinu en það er 5.000m hlaup karla sem haldið er til minningar um Jón H. Sigurðsson hlaupara frá Úthlíð. Það er frábær skráning í hlaupið en tólf hlauparar munu taka þátt sem er metskráning til margra ára.
Það er því upplagt fyrir áhorfendur að skella sér á frjálsíþróttavöllinn og fylgjast með spennandi keppni. Veðurspáin er góð en þess má geta að ef einhver keppandi setur Íslandsmet í fullorðinsflokki á mótinu þá fær sá hinn sami 100 þúsund króna gjafabréf frá Fætur toga.