Stór hópur frjálsíþróttafólks frá Selfossi og Þorlákshöfn hélt til Svíþjóðar í vikunni til að taka þátt í Gautaborgarleikunum.
Mótið er eitt af stærstu mótunum sem haldin eru í frjálsíþróttaheiminum og koma keppendur frá mörgum löndum til að taka þátt. Keppt er í öllum flokkum frá 12 ára aldri og uppúr.
Keppnishópur Selfyssinga og Þorlákshafnarbúa telur um þrjátíu keppendur og þriggja þjálfara. Auk þess fóru mjög margir foreldrar með í þessa skemmtilegu keppnisferð.
Keppni hófst í dag og lýkur á sunnudag. Veðurspá fyrir helgina er mjög góð svo búast má við því að einhver met falli um helgina og fjöldinn allur af persónulegum metum verður eflaust sleginn.
Áhugasamir geta fylgst með árangri sunnlensku keppendanna á heimasíðu mótsins.