Árborg og KÁ gerðu jafntefli í toppslag 4. deildar karla í knattspyrnu í kvöld. Á sama tíma tapaði Hamar úti gegn Kríu.
Á Selfossvelli sóttu gestirnir úr KÁ meira á upphafsmínútunum og þeir voru fyrri til að skora. KÁ komst yfir á 34. mínútu eftir skyndisókn en tveimur mínútum síðar komst Kristinn Sölvi Sigurgeirsson inn í vítateig gestanna og smellti boltanum í stöngina og inn. KÁ átti lokaorðið í fyrri hálfleik með marki á 45. mínútu og staðan var 1-2 í leikhléi. Seinni hálfleikurinn var í járnum, Árborgarar fengu betri færi en KÁ átti hættulegar skyndisóknir. Á 85. mínútu var aftur komið að Kristni Sölva og aftur smellti hann boltanum í stöngina og inn, nú af talsvert lengra færi. Lokatölur 2-2 á Selfossvelli.
Hamar og Kría mættust á Seltjarnarnesinu og þar komst Kría yfir strax á 6. mínútu. Það var eina mark fyrri hálfleiks en Krían var sterkari í seinni hálfleiknum. Kría komst í 3-0 á fyrstu fimmtán mínútum seinni hálfleiks og lokaði svo leiknum með fjórða markinu rétt fyrir leikslok. Þetta 4-0 tap var sjötti tapleikur Hamars í röð í deildinni.
Að loknum sex umferðum er Árborg í 3. sæti 4. deildarinnar með 11 stig, þremur stigum á eftir KÁ en Hamar er í botnsætinu án stiga.