Hamar/Þór heimsótti Tindastól í lokaumferð úrvalsdeildar kvenna í körfubolta á Sauðárkrók í kvöld. Tindastóll vann öruggan sigur, 90-68.
Leikurinn var jafn í fyrri hálfleik en Tindastóll náði smátt og smátt forskoti og staðan var 42-34 í hálfleik. Sauðkrækingar gerðu svo út um leikinn í 3. leikhluta, þar sem þær skoruðu 29 stig og staðan var orðin 71-46 þegar fjórði leikhluti hófst. Hamar/Þór klóraði þar lítillega í bakkann en ógnaði ekki sigri Stólanna.
Jóhanna Ýr Ágústsdóttir var stigahæst í liði Hamars/Þórs með 17 stig en Jovana Markovic var framlagshæst með 12 stig, 5 fráköst og 5 stoðsendingar.
Hamar/Þór varð í 4. sæti í B-riðli úrvalsdeildarinnar með 10 stig og fer í fjögurra liða umspil um sæti í úrvalsdeildinni að ári. Umspilið byrjar á Suðurlandsslag Hamars/Þórs og Selfoss.
Tindastóll-Hamar/Þór 90-68 (21-18, 21-17, 29-12, 19-21)
Tölfræði Hamars/Þórs: Jóhanna Ýr Ágústsdóttir 17, Mariana Duran 15/8 fráköst, Jada Guinn 12/4 fráköst/5 stoðsendingar, Jovana Markovic 12/5 fráköst/5 stoðsendingar, Bergdís Anna Magnúsdóttir 6/5 fráköst, Dagrún Inga Jónsdóttir 4, Guðrún Anna Jónsdóttir 2.