Stokkseyri tók á móti Skallagrím frá Borgarnesi í dag í fyrri leik liðanna í úrslitakeppni 5. deildar karla í knattspyrnu. Leiknum lauk með 2-1 sigri Stokkseyringa en seinni leikurinn í einvíginu fer fram í Borgarnesi að viku liðinni.
Leikurinn fór af stað með látum en bæði lið fengu fín færi á fyrstu tíu mínútunum. Eftir það var lítið að frétta, þar til á 36. mínútu að brotið var á Steinari Aroni Magnússyni í vítateig Skallagríms. Stokkseyringar fengu vítaspyrnu og úr henni skoraði Arilíus Óskarsson af öryggi.
Stokkseyringar héldu þó forystunni ekki lengi því að á 41. mínútu jafnaði Skallagrímur með nokkuð glæsilegu marki uppúr hornspyrnu og staðan var 1-1 í hálfleik.
Skallagrímur hafði yfirhöndina lengi framan af seinni hálfleiknum. Þeim gekk þó ekki vel að skapa sér færi og í þau fáu skipti sem boltinn nálgaðist rammann stóð Garðar Freyr Bergsson vel fyrir sínu milli stanganna.
Síðustu tíu mínúturnar hresstust Stokkseyringar nokkuð og á 83. mínútu skoraði varamaðurinn Hafþór Berg Ríkarðsson með góðu skoti úr teignum eftir undirbúning David Aitken Sævarssonar.
Lokatölur 2-1 en Stokkseyringar eiga erfitt verkefni fyrir höndum í Borgarnesi um næstu helgi en Skallagrímur hefur ekki tapað leik á heimavelli í sumar.