Stokkseyringar unnu góðan sigur á Létti í 5. deild karla í knattspyrnu í kvöld, 2-4 á ÍR-vellinum í Breiðholti.
Marteinn Maríus Marinósson kom Stokkseyringum yfir á 13. mínútu og Arilíus Óskarsson tvöfaldaði forskot þeirra fjórum mínútum síðar. Léttir minnkaði muninn á 30. mínútu og staðan var 1-2 í hálfleik en strax á 2. mínútu seinni hálfleiks kom Marteinn boltanum aftur í netið og staðan orðin 1-3.
Hafþór Berg Ríkharðsson skoraði fjórða mark Stokkseyringa skömmu síðar og gerði nánast út um leikinn. Það voru hins vegar Léttismenn sem áttu lokaorðið, þeir minnkuðu muninn í 2-4 þegar rúmar tuttugu mínútur voru eftir. Sigri Stokkseyringa var hins vegar ekki ógnað og þeir voru léttir, ljúfir og kátir í leikslok.
Staðan í B-riðlinum er þannig að Stokkseyri eru í toppsætinu með 16 stig en Léttir er í 7. sæti með 6 stig.